السبت، 13 سبتمبر، 2008

فرحة فرحة فرحة

يوم مضيء في تاريخك يا مصر


محافظة القاهرة عملتها


محافظة القاهرة جابتها و ركبتها


بيوت جديدة لانج .. أيوة

بيوت جديدة لانج


لكل أسرة نفدت بجلدها في الدويقة بيوت جديدة لانج


بس السؤال ..









لأ .. مش البيوت القديمة راحت فين ، ما هي متنيلة تحت الجبل




السؤال هوة :

البيوت الجديدة كانت فين ؟!

الأحد، 10 أغسطس، 2008

محمود درويش .. تصبح على و طن

Photobucket




إلى من عاين الوطن حقيقة و غنى للشهداء

محمود درويش

أنتم السابقون و اللاحقون

ولا عزاء للأقزام

:::::::::::


هو هادئٌ، وأنا كذلك


هوَ هادئٌ، وأنا كذلك

يحتسي شاياً بليمونٍ،

وأشربُ قهوةً،

هذا هو الشيءُ المغايرُ بيننا.

هوَ يرتدي، مثلي، قميصاً واسعاً ومُخططاً

وأنا أطالعُ، مثلَهُ، صُحُفَ المساءْ.


هو لا يراني حين أنظرُ خلسةً،

أنا لا أراه حين ينظرُ خلسةً،

هو هادئٌ، وأنا كذلك.

يسألُ الجرسون شيئاً،

أسألُ الجرسونَ شيئاً...

قطةٌ سوداءُ تعبُرُ بيننا،

فأجسّ فروةَ ليلها

ويجسُّ فروةَ ليلها...


أنا لا أقول لَهُ: السماءُ اليومَ صافيةٌ

وأكثرُ زرقةً.

هو لا يقول لي: السماءُ اليوم صافيةٌ.

هو المرئيُّ والرائي

أنا المرئيُّ والرائي.

أحرِّكُ رِجْليَ اليُسرى

يحرك رجلَهُ اليُمنى.

أدندنُ لحن أغنيةٍ،

يدندن لحن أغنية مشابهةٍ.


أفكِّرُ: هل هو المرآة أبصر فيه نفسي؟

ثم أنظر نحو عينيه،

ولكن لا أراهُ...

فأتركُ المقهى على عجلٍ.

أفكّر: رُبَّما هو قاتلٌ، أو رُبما ..

هو عابرٌ قد ظنَّ أني قاتلٌ


هو خائفٌ، وأنا كذلك!


------------------------------


مقهى و أنت مع الجريدة


مقهى، وأنت مع الجريدة جالس

لا، لست وحدك. نصف كأسك فارغ

والشمس تملأ نصفها الثاني ...

ومن خلف الزجاج تري المشاة المسرعين

ولا تُرى [إحدي صفات الغيب تلك:

ترى ولكن لا تُرى]

كم أنت حر أيها المنسي في المقهى!

فلا أحدٌ يرى أثر الكمنجة فيك،

لا أحدٌ يحملقُ في حضورك أو غيابك،

أو يدقق في ضبابك إن نظرت

إلى فتاة وانكسرت أمامها..

كم أنت حر في إدارة شأنك الشخصي

في هذا الزحام بلا رقيب منك أو

من قارئ!

فاصنع بنفسك ما تشاء، إخلع

قميصك أو حذاءك إن أردت، فأنت

منسي وحر في خيالك، ليس لاسمك

أو لوجهك ههنا عمل ضروريٌ. تكون

كما تكون ... فلا صديق ولا عدو

يراقب هنا ذكرياتك /

فالتمس عذرا لمن تركتك في المقهى

لأنك لم تلاحظ قَصَّة الشَّعر الجديدة

والفراشات التي رقصت علي غمازتيها /

والتمس عذراً لمن طلب اغتيالك،

ذات يوم، لا لشيء... بل لأنك لم

تمت يوم ارتطمت بنجمة.. وكتبت

أولى الأغنيات بحبرها...

مقهى، وأنت مع الجريدة جالسٌ

في الركن منسيّا، فلا أحد يهين

مزاجك الصافي،

ولا أحدٌ يفكر باغتيالك

كم انت منسيٌّ وحُرٌّ في خيالك!

-------------------------------

تصبحون على و طن



عندما يذهب الشهداء الى النوم

أصحووأحرسهم

من هواة الرِّثاء

أقول لهم :

تُصبحون على وطن،

من سحابٍ ومن شجرٍ،

من سراب وماء

أهنئُهُم بالسلامةِ من حادثِ المُستحيل

ومن قيمة المذبح الفائضة

وأسرقُ وقتَا لكي يسرقوني من الوقتِ.

هل كُلُنا شهداء؟

وأهمس :

يا أصدقائي اتركوا حائطاَ واحداً،

لحبال الغسيل،

اتركوا ليلةَ للغناء

اُعلِّق أسماءكم أين شئتم فناموا قليلاً،

وناموا على سلم الكرمة الحامضة

لأحرس أحلامكم من خناجر حُراسكم

وانقلاب الكتاب على الأنبياء

وكونوا نشيد الذي لا نشيد له

عندما تذهبون إلى النوم هذا المساء

أقول لكم :تصبحون على وطنٍ

حمّلوه على فرس راكضه

وأهمس :

يا أصدقائي لن تصبحوا مثلنا ...

حبل مشنقةٍ غامضه !


السبت، 2 أغسطس، 2008

هية دي مصر يا عبلة

سارة زعلانة جدا أن المدونة نايمة
طب هوة فيه أيه في بيطري مش نايم
أنا قعدت أحاول أصحي في بيطري خمس سنين .. و بعدين أعصابي تعبت
قمت منفضلها و أعتزلت العمل العام
بعد سنتين لاقيت الناس الجديدة ربنا كرمهم و عملوا حاجة
هوة صحيح معظم اللي بيعملوه حاجات تقليدية و لا تساعد على تشغيل الدماغ خالص
بس أهم مشكورين .. لأن الحاجات دي في الأول و في الآخر بتنمي الشخصية
و بتخرج العيال من حالة التتنن اللي همة فيها
(و التتنن دي جاية من كونهم تنانين .. يعني كذا تنين في بعض)
فما لاقيت كدة قلت نعمل ثقافة تاني
فعملت المدونة دي عشان نقول للدنيا أن بيطري مش شوية بتوع قاعدين يلعبوا في شوية بتوع
و أن فيها ناس بتفهم و عندهم فكر
و جبت في المدونة نخبة من مثقفي بيطري عشان يعبروا عن نفسهم
لكن نسيت أننا بني آدمين و أن أكيد البيطري هيفضل بيطري
و أن الكلية أكيد هتكرف على المدونة
و أن الواحد اللي بيصطبح بالشئون و مدام أميمة و طرقة الإدارة
عمره ما هيقدر يبدع
بس ملحوقة
مع كام مدون متحمس زي سارة كدة .. ممكن فعلا نغير الوضع
فشدوا حيلكوا معانا

أنا بأقول نفتح حوار حوالين الموضوع .. أيه رأيكوا ؟

الاثنين، 28 يوليو، 2008

و السلام

اللي حصل حصل
و اللي مات مات
لكن و بعد سنتين و نص
المحكمة المصرية طلعت اللي بلغ هوة اللي غلطان
لكن ما قالتش مين المسئول
أكيد فيه مسئول


Pink - Dear Mr President

Pink - Dear Mr President (live)




Dear Mr. President,
سيدي الرئيس
Come take a walk with me.
تعالى .. نتمشى مع بعض شوية

Let's pretend we're just two people and
تعالى نتظاهر بأننا مجرد اتنين من الناس

You're not better than me.
و أنك مش أحسن مني فـ حاجة


I'd like to ask you some questions if we can speak honestly.
كنت عاوزة أسألك كام سؤال .. لو ممكن نتكلم مع بعض بصراحة

What do you feel when you see all the homeless on the street?
بتحس بأيه لما تشوف كل المشردين دول في الشوارع ؟

Who do you pray for at night before you go to sleep?
و مين اللي بتدعيله بالليل قبل ما تروح تنام ؟

What do you feel when you look in the mirror?
بتحس بأيه لما بتبص في المراية

Are you proud?
مبسوط من نفسك ؟

How do you sleep while the rest of us cry?
أزاي بيجيلك نوم و أحنا بنبكي ؟

How do you dream when a mother has no chance to say goodbye?
أزاي تقدر تحلم و فيه أم ما عندهاش فرصة حتى تودع أبنها ؟

How do you walk with your head held high?
أزاي تمشي رافع راسك ؟

Can you even look me in the eye
هل تجرؤ أنك تبص فـ عيني

And tell me why?
قل لي ليه ؟

Dear Mr. President,
سيدي الرئيس

Were you a lonely boy?
هل كنت طفل و حيد ؟

Are you a lonely boy?
هل أنت طفل وحيد ؟

Are you a lonely boy?
هل أنت طفل وحيد ؟

How can you say
أزاي تقدر تقول

No child is left behind?
أن أحنا عمرنا ما نسينا طفل ورانا ؟

We're not dumb and we're not blind.
أحنا مش أغبيا .. و لا أحنا عمي

They're all sitting in your cells
وكلهم أكيد هيحتلوا كل خلية فيك

While you pave the road to hell.
و أنت مسحول على الطريق لجهنم

What kind of father would take his own daughter's rights away?
أنهي أب ده .. اللي يحرم بنته من حقوقها

And what kind of father might hate his own daughter if she were gay?
و أنهي أب ده اللي يكره بنته حتى ولو كانت شاذة

I can only imagine what the first lady has to say
أنا مش قادرة أتخيل إلا اللي السيدة الأولى ممكن تقوله

You've come a long way from whiskey and cocaine.
أنك أنت نفسك يا دوب لسة راجع من طريق طويل من الويسكي و الكوكايين

How do you sleep while the rest of us cry?
أزاي بجد تنام و أحنا بنبكي ؟

How do you dream when a mother has no chance to say goodbye?
و أزاي تحلم و فيه أم ما عندهاش فرصة حتى تودع أبنها ؟

How do you walk with your head held high?
و أزاي تمشي رافع راسك ؟

Can you even look me in the eye?
هل تجرؤ فعلا أنك تبص في عيني ؟

Let me tell you 'bout hard work
تعالى أقولك بجد عن الشقى

Minimum wage with a baby on the way
و الحد الأدنى من الأجور و هوة في طفل جاي في السكة

Let me tell you 'bout hard work
تعالى أقولك عن الشقى

Rebuilding your house after the bombs took them away
و عن محاولات ترميم البيت بعد ما هدته القنابل

Let me tell you 'bout hard work
تعالى أكلمك عن الشقى

Building a bed out of a cardboard box
عن عمل سرير من ورق الكراتين

Let me tell you 'bout hard work
تعالى أكلمك عن الشقى

Hard work
الشقى

Hard work
الشقى

You don't know nothing 'bout hard work
أنت ما تعرفش حاجة عن الشقى

Hard work
الشقى

Hard work
الشقى

Oh
آآه

How do you sleep at night?
بيجيلك نوم بالليل ؟

How do you walk with your head held high?
و أزاي بتقدر تمشي رافع راسك ؟

Dear Mr. President,
سيدي الرئيس

You'd never take a walk with me.
عمرك ما تجرؤ تتمشى معايا شوية

Would you?
تقدر ؟

الخميس، 3 يوليو، 2008

من الأرشيف البيطري : "هل هي لعنة الفراعنة" مقال لأسلام عبدالخالق

Egyptians, Luxor

هل كل ما يحدث لنا - نحن شعب مصر - من بطالة و أزمات اقتصادية

Some people sell newspapers on the streets to make a bit of money.

و تلوث بجميع أنواعه و أمراض مميتة و قلة الذوق المشهورين بيها في كل مكان

Poor people live in the streets

و الكسل و الغم و أخيرا الجراد الأحمر المسلط علينا ليأكل الأخضر و اليابس

People 4

.. هل كل ذلك بسبب أننا قوم فرعون الملعون في القرآن هو و قومه ؟!

The Egyptians

لقد ضربت مصر أروع مثل في النهوض و التنمية ؛ فمصر الدولة الوحيدة في العالم التي تحاول أن تنهض منذ سبعة آلاف سنة و لسة بتحاول
و الحمد لله .. كل اللي عملناه أن أحنا بنينا الهرم و قعدنا عليه !!

Hatshepsut ObeliskObelisk

الأحد، 1 يونيو، 2008

أبويا يتنازل عن صندوق العمارة إثر اتهامات بالفساد

تفاصيل الخبر
رويترز - وكالات الأنباء


صرح مصدر مسؤل في مدخل العمارة أن السيد عبدالحي - أمين الصندوق قد أعلن عن نيته في التنحي عن منصبه إثر اتهامات رسمية بالفساد و استغلال النفوذ . و من الجدير بالذكر أن لجنة تحقيق في الحوادث المنسوبة برئاسة ساكن من الدور الخامس و عضوية ساكنين أثنين من الدور الرابع و الثاني ، و بعد تحقيق دام 15 دقيقة قد أصدرت حكمها ببطلان الدعاوى المنسوبة إلى المسؤل الكبير باتحاد الملاك ، إلا أنه في تصريحات خاصة للوكالة أصر على التنحي في جمعية عمومية عاجلة يوم الأحد القادم وقال : ست سنين كفاية عليهم .



تعليق على الخبر :

قلتله يابا أنا ياما نصحتك و قولتلك أن تداول السلطة من أهم دعائم الديموقراطية
قلتلك أن بقاء المسؤل في مكانه لفترات طويلة بيخلق مراكز قوى
قلتلك أن العمارة محتاجة لدم جديد و تنمية موارد و انت جبت آخرك
قلتله أنتة لو ملاك نازل من السما وقعدت لما خللت في مكانك لازم هيتهموك بالفساد .. أمال ماسك في المكان ليه
أمي أعترضت و قالت أن العمارة هتبقى خرابة
و أن التجارب أثبتت أن كل اللي مسكوا الصندوق غيرك سرقوه أو على الأقل أحتاسوا
قلتلها ياأما التغيير مطلوب ولو على سبيل شوفي يا ناكرة خير زمني من زمن غيري
قلتلها أن الأصل في الأشياء النضافة و القذارة هية الاستثناء
قلتلها أن الأصل في الناس الأمانة و السرقة هي الأستثناء
ابويا قال : أنا عملت نظام في الحسابات لو مشي عليه حمار مش هيغلط و لو شيخ منصر مش هيعرف يسرق
قلتله تبقى تدعم الديموقراطيه و تسيب الصندوق
وسيبته بيعمل حساب ختامي يقدمه لأي حد يقلعله ملط في الاجتماع
و بعدها يكتب خطاب التنحي بمزاج




--------------------- هامش :

و أنا في سنة تانية من قيمة خمس سنين كنت عند وكيل شئون البيئة "أ.د./ الحسيني" في مكتبه . و بالصدفة كان عنده مندوب الشركة الألماني اللي مناقصة شرا المحرقة كانت على وشك ترسى عليها
رميت ودني و سمعت أن السعر المبدأي في حدود سبعين أو ميت ألف جنيه و أن المحرقة هتكون جاهزة على الصيف الجاي
أ.د./هاني جوهر خلف الدكتور الحسيني في الوكالة و بلاد شالتنا و بلاد حطتنا و من قيمة سنة أو أكتر شوية سمعنا أن المحرقة و صلت بعد ما الجامعة أدت للكلية ربعميت ألف جنيه
و في يوم توقيع كتاب مدونات مصرية للجيب و بعد الحفلة قابلت واحد زميلي من تجارة .. لاقيته بيضحك جدا سألته قال : أصلي قريت في الجرنان أن الشرقية للدخان أتبرعت لكليتكوا بنص مليون جنيه لصالح إنشاء المحرقة .. هاهاهاهاهاها
أفتكرت ساعتها زميلي اللي سأل العيال الصغيرة اللي كانوا بييجوا يلعبوا في ملعب الكلية بعد ما نمشي : أنتوا تبع مين يا بابا
فقالوله : إحنا تبع النادي !!

الأحد، 25 مايو، 2008

رثاء

أنا قلت كتير الحب عبيط
وزهقت مشاعروحكاوى
وزهقت م التنطيط
وانا شاعر ناوى اتجن
واتكن
فى البيت اللى حيطانه نقصت حيط

هتولع حاجه يا ادهم
ف ايديك يا معلم

ولاكنتش طول عمرك صاحبى
وانا عارف انى مكنتش صاحبك
لكن عيط عليك
وعرفت ان الدنيا غش ف غش
ايوة يا صاحبى مكنتش صاحبى
بس امانه
لو عديت ع الدنيا دى تانى
متحشش



الأربعاء، 21 مايو، 2008

جهلاء .... يظنون أنهم سعداء(( شروخ فى مرآة الروح )) بقلم : نور الدين صلاح

جهلاء .... يظنون أنهم سعداء

(( شروخ فى مرآة الروح ))

بقلم : نور الدين صلاح

السلام عليكم

إنه تحقيق في نفوس من البشر....وتدقيق بما فيها

من أفكار....معتقدات....كلمات....

لكم حق ترجمتها بفكركم والنطق بما تجود به أفكاركم

ولا تلوموني على صراحتي...

ولكن لي وجهة نظر فحسب!


-*-*-*-*-*-*-*-*-

ثلاث جهلاء...

يظنون أنهم سعداء مع أنهم أتعس التعساء يعيشون بين اليأس والشقاء يمرون

بالضراء فالضراء يوهمون الناس وأنفسهم بأنه أقوياء ولا يعلمون أنهم أضعف

الضعفاء أمام قوة العزيمة والذكاء...

يصرخ الأول:أنا أمير الأمراء وجميعكم بعدي جراثيم سوداء ومن كثرة الغباء

يحسبون أنه مديح وإطراء!

فيتقدم الثاني: أنا مفرج الكرباء للفقراء والأغنياء من أراد

عيش السعداء سأرمي به في قعر بئر ليس به ماء ولا هواء فيصرخ الجمع يحيا

مفرج الكرباء يحيا مفرج الكرباء!

أما الثالث: فيرفع رأسه مختالا إلى السماء ويتبختر

في مشيته في ثياب بيضاء ويطلب من الناس الوقوف والانحناء ويصنع لنفسه عظمة

وكبرياء فيتقرب منه حثالة الناس والأغبياء يضحكون معه ضحكة الأذلاء ويرجون

ما تحته من ثراء فينظر إليهم نظرة حقد واستهزاء ويخرجهم من أرض الفِنَاء ملقياً

بهم ساحة الفَنَاء يبكون الجوع والعطش والعراء..

-*-*-*-*-

سنتعرف على تفكير كل من الثلاثة السابقين....



يصرخ الأول:أنا أمير الأمراء وجميعكم بعدي جراثيم سوداء ومن كثرة الغباء

يحسبون أنه مديح وإطراء!

وكل من يسمعه يحسبون أنهم أذكياء...يحسبون أنهم سعداء

هذا مثال بيننا منه الكثير
لا نعرف لم يتبعونهم
ولا نعرف لمَ يقبلون ما يفعلون بهم
او معهم

لانهم فقط إعتمدوا على سابقة
جميلة في عيونهم
وحسنة في مبادئهم المريضه
فقط من هؤلاء كل خزي
فيقول لهم
أنا أمير الأمراء...رغم أن كل ما يقوم به غباء!
ويقول لهم
جميعكم بعدي جراثيم سوداء
لا يحتجون
فهو العظيم بنظرهم
كما قلت
بسابقة فعلها وأعجبتهم لأنهم مريضوا النفوس
فيحسبون أنه يسكب عليهم من حكمته وكلامه الرائع بنظرهم وأفعاله المحببه عندهم

أتعلمون من من أمثلتهم!

من أمتنا...من مدينتنا...من شارعنا...من كليتنا!

منهم الكثر والكثير

لن أقول من

فقط عليكم بالمقارنة

والبحث عن من يشابه هؤلاء

لأنهم جهلاء يظنون أنهم سعداء!
شكراً

الثلاثاء، 20 مايو، 2008

روح الفريق Team Spirit





فى جولة سريعة فى مكتبة مبارك استوقفنى كتاب (( الانتصار مع فريق العمل )) , ربما استوقفنى لأن الأسرة الذى أنا عضو من

أعضاءها المؤسسين فى الكلية تحمل نفس المفهوم الذى يحمله الكتاب ..... ألا و هو (( روح الفريق )) ... عندما فتحت الكتاب ابهرنى من

الوهلة الاولى

..... لم أغلقه إلا عند آخر صفحة .....


يتناول الكتاب إقتباسات على ألسنة أنجح شخصيات العالم فى جميع المجالات , رجال الاعمال , المثقفين , و العلماء والادباء وغيرهم .....

(( إننا نحاول بلوغ القمر ..... إذا لم تستطع تشجيع شخص ما , فمن فضلك لا تحاول التقليل من شأنه ....هذه هى روح الفريق ))

ذلك الشعار ما هو إلا شعار وكالة ناسا الفضائية .....حيث أيقنت و أجمعت أن روح الفريق لا تنبع إلا من الاحترام المتبادل بين أعضاء

الفريق

و من العبارات الأخرى التى رسمت على وجهى إبتسامة واسعة هى :

1 - (( تعامل مع أخطاء الآخريين بنفس اللطف الذى تتعامل به مع أخطائك )) مثل صينى

2- (( لا تنظر لأى شخص من علٍِ إلا إذا كنت تحاول مساعدته على الارتفاع )) (( جيس جاكسون )) ...

3 _ (( قدم الثناء علانية ... ووجه النقد سرا و بهدوء )) كاثرينا الثانية

4 - (( ليس بيننا فرد واحد يبلغ ذكاؤه درجة أعلى منا مجتمعين )) كين بلاتشارد ...

5 - (( الحياة التى نعيشها من أجل الآخريين هى فقط التى نستحق أن نعيشها )) ألبرت أينشتين

6- (( ليس الفريق الأسرع هو الذى يفوز دائما بالسباق , و لكنه الفريق الذى يواصل العدو )) مجهول

7- (( إذا كانت الأمطار هى المصدر الوحيد لمياه الأنهار ... لجفت سريعا ... و إذا كانت حياة الأنسان تعتمد على موارده الشخصية فحسب فإنه يسقط سريعا .... كن ممتناَ لمن يساعدونك بمواردهم )) ... (( د . و يليام أرثر ))


كل ذلك ما هو إلا نصائح قدمها أناس قبلنا كانوا ناجحون أشد النجاح و هذا النجاح ليس نجاح فردى بل كان نجاح فرق متكاملة الفكر و شديدة الحماس .... فمن الغباء ان نضع كل ذلك عرض الحائط و نمر عليها مرور الكرام , لانك يوما ما لا بد لك ان تعمل فى فريق سواء فى الجامعة أو بعدها .....


ربما فى أسرة الكلية Team Spirit قد تعلمت أشياء كثيرة ... قد تعادل ما تعلمته فى كل الثمانية عشر عام التى قضيتها فى حياتى قبل إنشاء الفريق .... الآن نحتفل بمرور عام على التأسيس ... و نحتفل إيضا بمرور عام على أسرة متغيرة الفكر ... و النظرة ...
.... ذلك الفريق الذى بهر الادارة والطلبة فى عام دراسى واحد من نشاطات مختلفة .... ربما يكون ذلك نجاح وقتى ... ولكن النجاح الحقيقى هو الاستمرار فى النجاح ....


و اختم بعبارة قالها دوريس بيكرن

(( لا بد و أن يكون هناك قدر معين من المعارضة داخل الفريق , فهذا مفيد ... الطائرات الورقية لا ترتفع فى السماء مع اتجاه الريح , و لكن ضده )) ...



الاثنين، 12 مايو، 2008

من كتاب كفاحي ج2 - امتحانات ترم تاني خامسة بيطري

عندما استمعت لمسرحية "عدو المجتمع" لسارتر .. فهمت كيف كان الناس ينظرون لي حتى و قت قريب . و تحيرت كثيرا مرتديا ذاتي الجديدة لأي الفأتين أميل ؛ المجتمع المائع الذي فقد القدرة على تسمية أي شيء باسمه ، أم ذلك الحيوان المذعور الذي يخمش كل من يقترب منه ؟!! .. تخيل فيلا بريا و قد هرب من شاحنة النقل ليبرطع في المدينة ، و حاول أن تحدد موقفك منه
ربما سيفزع ، و سينطلق ليدمر كل شيء يطأه .. و ربما يقتل شخص أو شخصين ... حسنا .. فلترفع يدك بالبندقية لترديه ، لكن هل سيكون ضميرك مرتاحا ؟ فأنت تعلم بالرغم من كل شيء أن الذنب ليس ذنبه .. تعلم أن القلب الذي ستهتكه الرصاصة ما هو إلا قلب كائن تائه و مذعور .. تماما مثلك
ربما هذه الأزمة الأخلاقية لا تعني الكثير للكثيرين ، خاصة عندما يكون الاختيار بين نجاتهم و أي شيء آخر . فهم على أي حال يمكنهم دائما التشدق بالناس و المجتمع والمصلحة العامة .. و ربما يكونون على حق ؛ فماذا سيفعل فيلا بريا في المدينة على أية حال ؟ ! ربما كان يجدر به أن يموت من تلقاء نفسه

من كتاب كفاحي ج2 - ترم تاني خامسة بيطري

نعم في الحياة جراح كالجذام كما قال "صادق هدايت" لكن فقط لأننا ندعها تأكلنا ، لأننا نخبئ السجائر المشتعلة في جيوبنا و نسير متظاهرين بأننا أقوى مما نحن عليه . جراح .. أي أننا في هذه الحال نكون قد تجاوزنا مرحلة حماية أنفسنا بعد أن أصبحنا غارقين في دمنا تماما . فلماذا نختبئ ، و لماذا نكفي على الخبر ماجور و نتركه ليتعفن فينا
الجبن سيد الأخلاق
لهذا أدرك أني بالرغم من كل شئ قد تركت الجراح تتعفن .. تركت روحي تصاب بالغرغرينا ، و تتسمم لتموت قطعة ، فقطعة دون حتى أن أتحرك لأتخلص مما يموت كي لا يفسد باقي مساحات الشعور .. و عندما كنت أشتكي من الغلالة العفنة التي تغلل روحي ، لم أتساءل حقا من أين تأتي هذه الرائحة . . و الآن ... ماذا سأفعل
وقد أوقعت نفسي بالصدفة البحتة داخل كراكيبي ، و علي الآن أن أتقمص شخصيات النجار والسباك و الحداد و النقاش ، ثم الزبال و المغسل و الحانوتي .. ثم أتجاسر لأنبش ما مات ، و أدفن ما أنبش ، وأعود لأمشي بين الناس محاولا أن أقنعهم أني لم أعد الزومبي الذي كنت عليه ، بالرغم من أني لم أصبح بعد الشيء الذي يريدونه

من كتاب كفاحي ج1 - ترم تاني تالتة بيطري

عندما تكون قابعا في مساحة واحد ونص × واحد ونص متر مربع و أنت شخصية مجهولة ، في شقة مجهولة ، في عمارة مجهولة ، في حي مجهول ، و مع ذلك .. تشعر أن العالم كله ضدك ؛ من رئيس الولايات المتحدة ، حتى مجموعة الأطفال الذين يلعبون الكرة تحت نافذتك .. لابد أن تشعر أن هناك خطأ ما
فإما أن تكون مصابا بجنون الارتياب
أو أنك تحيا في عالم مجنون


*-------------*


في بعض الأحيان تكون السعادة أقوى من أن يحتملها الإنسان فيصاب بأزمة قلبية . و أحيانا يكون الحلم جميلا جدا لدرجة أن الحالم يستيقظ في نشوة انفعاله دون أن يكمله . و أحيانا يدعنا أعداءنا نحلم ؛ حتى و عندما يبددوا الحلم يكون الأحباط أقوى و أشمل ، و أحيانا تأتي السعادة لترتمي تحت أقدامنا لكننا نتركها تبلل الأرض ، و نمضي غير مصدقين أنها موجودة
You are too good to be true !!


*------------*


عندما ساقونا جميعا إلى عيادة المدرسة في المرحلة الابتدائية ، بينما أنتظر دوري على الباب رأيت الطبيبة تكرر نفس التعليمات و نفس الأوامر للطلبة أثناء عملية الكشف ، و مع أنهم يسمعونها جيدا كما أسمعها لم يكن أي منهمينفذها من تلقاء نفسه عندما يحل دوره و يتوجه للكشف
و جاء دوري .. و لأنني سريع الملل منذ صغري ؛ جلست على كرسي الكشف ، رفعت قميصي لأعري بطني ، و فتحت فمي مخرجا لساني غختصارا لتعليمات الطبيبة
فوجدتها بلا سبب تسبني ، و تقول لي : أتعدل و دخل لسانك .. كده عيب
!!

و الله إسلام و حشني

شهر دلوقت من ساعة تدوينة إسلام و أنا كل ما أدخل المدونة أقول يمسيك بالخير يا إسلام ؛ كنت عاملنا حس و سط المدونات

شهر دلوقت و لا حس و لا خبر برغم أن بلاوي زرقا كتير حصلت إضرابين و اعتصام الدكاترة و الغلا و الحمامات اللي لسة مقفولة و الامتحانات اللي دخلت .. و برضه محدش فينا كمدونين بيطريين علق أو أتكلم


علشان كدة بأقف قدام بيطري بمزيد من الإجلال و التوقير لأني بألاقي فيها كل انعكاس و لو صغير لكل حاجة في مصر .. حتى مثقفينها أنتخوا و ريحوا التيتا


عم ماهر مشكورا بيدخل يعمل بوستات و يحفظها مسودات ، و عمرو و كفراوي عاملين فيها مهمين و مش فاضيين وكريم و نور شايفين أن المدونة فيها تخبيط كتير و أن قريب جدا بمجهوداتي و مجهودات عمران و هتبقى مدونة سكس .. ما فيش غير رفيق عمري عمران هوة اللي نصفني بتدوينة ، هية صحيح واحدة بس كما قال القائل "ولا بالقصر ولا بالطول ، الرك عـالمفعول " فشكرا يا عم عمران


أصدقائي المقربين يعرفوا أن عندي حاجات لم تنشر سواء البضانيات أو الأميات البيطرية أو حتى رباعيات الحب و البضان .. حاجات كنت على و شك تدوينها بعد الامتحانات الأخرانية لولا صحوة مفاجئة لضميري . لكن دلوقت ، و لأن الظروف ظريفة زي ما أنتوا عارفين و كل امتحانات و أنتوا طيبين .. قررت أنشر أجزاء من رائعتي النثرية "كفاحي" المذكرات النفسية للعبد لله أثناء تواجده في غابة الطب البيطري جامعة القاهرة ، و الله المستعان


شفت يا عم إسلام بعدك و صلنا لأيه




الخميس، 10 أبريل، 2008

نهاية..يوميات واحد هيسافر

النهاردة يخاص يوم الخميس وهو يوم غريب وعجيب مليء بالاحداث وكأن الاحداث ظلت كامنة لشهر كامل انفجرت النهاردة
صحيت بدري وقعدت مع امي حكيت معاهاشوية وبعدين جالي اتصال علي العاشرة صباحا
الو:د.اسلام
ايوة
انت هتسافر بعد بكرة السبت 12/4 ان شالله من مطار القاهرة رحلة 670 من المطار القديم
سلام
سلام

وجاء الخبر عليا كالصدمة ولو اني كنت متوقع اني ممكن اسافر السبت بس معرفش حسيت زي اللي عرف انة هيموت وعايز يعمل كل حاجة ويكلم كل الناس ويلم كل اوراقة
حالة من الارتباك اصابتني وزادت بعلم امي هذا الخبر السعيد فنشرت في البيت حالة من الطواريء

نزلت واخدت فطاري في شنطتي ورحت علي مكتبة الفاو في الدقي قريت حاجات في اللحوم وبعدها روحت المكتبة الاكاديمية بجوار محطة الدقي كان عرفها ليا صديقي اسامة العايدة وهي فعلا مكتبة محترمة ومليئة بالكتب العلمية الجميلة ..اشتريت كتاب في جودة الاغذية وبعدين ذهبت لمقر الشركة لكي استلم عقد عملي النهائي وتذكرة طيران عبارة عن ورقة A4بيقولوا عليها التذكرة الالكتروني

نزلت وسط البلد غيرت شوية فلوس وجبت شوية حاجات ورحوت علي بيتنا في الهرم ليبدأ نوع من العذاب القاسي جدا اسمة توضيب شنطة السفر ووكلت المهمة الجميلة دية لامي العزيزة ربنا يكرمها
............................................................................
اتصل واحد صحبي :الو اسلام انا عرفت انك مسافر انا جاي من دمياط علشان اشوفك
انا هجيلك عشرة بليل
وفعلا اتقابلنا ف شارع الهرم وقعدنا علي كافتريا واتكملنا وحكينا شوية وبعدين وصلتة ورجعت بيتي اكمل تحضير اوراقي واقرأ العقد وحاجات سفري علي مهل
...........................................
اخيرا النهاردة اتصلح جهاز الكمبيوتر بتاعنا بعد اربعة اشهر قضاها في غيبوبة مرضية شديدة اثر فيرس خبيث اتبعتلي من صديق ظريف
..............
جبتلي كارت شحن جديد علشان نكلم الناس اللي نعرفها نقولهم سلام يابشر ونشوفكم بعد الفاصل

وطبعا تلقيت اتصالات تليفونية كتيرة
والاهم بقي ان بكرة يوم الجمعة انا متأكد انة هيبقي يوم مراجيح يامعلم
زيارات ودوشة وظيطة وربنا يعدية بالستر علشان الواحد مش ناقص صداع ..ممكن الواحد يتخنق علي الناس ويطردهم كلهم ربنا يستر

المهم انا طولت جدا عليكم في حكاوي ملهاش لازمة
بس كان الهدف من يوميات واحد هيسافر اني اكتب حالتي وشعوري في هذة الايام ..فشكرا لاستحمالكم كلامي الرخم
واحب بقي في اخر الكلام
ارمي سلام كبير جدا لصديقي العزيز وهو اكتر من صديق
محمد عبد الحي

واشوفكم علي خير

الأربعاء، 9 أبريل، 2008

يوميات واحد هيسافر-6

1-
ومعاك ياعم التلات والاربع عدوا هما كمان
يوم التلات كالعادة صاحي مكسر وكأني كنت بكسر حجارة ف الحلم..صحيت لقيت امي بتتفرج علي برنامج اسمة ضد التيار علي روتانا قلت اتفرج لقيتهم مستضفين حتة ست صباح الانوثة رغم انها اكبر من امي ولكنها بحق كانت افتتاحية جميلة ليومي اني اشوف المنظر دة والاجمل في الموضوع ان الست دية وهي لبنانية للي يعرفها هي (نضال الاحمدي) اللي بترأس مجلة الجرس..المهم قعدت مع امي شوية لقتني قاعد مبحلق ف الست قالتي خد يابني فك ورق العنب معايا ..ايدي اتهرت الله يقطع الجواز والعيال.ربنا يخدني..طبعا شتان بين الدكتور زينب امي وبين الست الجامدة اللي قدامي
المهم بعدها قعدت اقرا لغية العصر ..امي قالتي يالا يابني نخرج
قلتلها انا عندي عزا واحد صاحبي في شبرا هروحة علي الساعة سابعة كدة
قالتلي :ماشي يالا وهتروح بعدها العزا..المهم قعدنا نفكر نروح فين !!!!!!!!مش عارفين
المهم جة واحد دكتور صديق العيلة وخدنا لكارفور -طريق مصر الاسكندرية الصحراوي
اية ياجماعة الفخفخة والابهة والجمال دة ..حاجة كدة تحس انك مش في مصر ولا في ازمة اسكان ولا ازمة عيش
حاجة تخليك هتتفقع
منين ثورات الجياع اللي بتتعمل كل يوم ومنين كمية العربيات الفخمة والاكل والمولات اللي بالهبل دية في مصر
...................................................................................................................................

2-
روحت العزا علي الساعة تسعة ونص ..طبعا نتيجة زحمة المرور كالعادة ..وروحت البيت في الاخر اتعشيت واتفرجت علي فيلم عن حياة كلينتون ومراتة من ايام الجماعة لللرئاسة كان فيلم تحفة علي الجزيرة ختمت بي يومي وسافرت في قطار النوم وتمنيت اني ابقي في يوم بل اسلام زي بل كلينتون
.......................
3-
يوم الاربع كان يوم ظريف جدا مفهوش حاجة مفيدة علي الاطلاق تذكر من صباحية ربنا
اللهم الا
اني نزلت وسط البلد وقبلت فتاتي وقعدنا حوالي ساعتين مع بعض قضيناهم في التمشية وسط صراخ وزحام خلق الله وجابتلي هدية بمناسبة سفري..ورجعت للبيت تاني اقرأ واتفرج علي النت والتلفزيون شوية
كلمت صديقي عبحي اخيرا رجع لعافيتة وصحتة بعد ان داهمة مرض البرد اللعين اللي حول صوتة الجهوري الي صوت فحيح ثعبان اتقطع ديلة من كتر الحسرة

اختم لكم اليومين الخفاف دول بحكمة قريتها النهاردة للحاج نجيب محفوظ :
**من كان منا يحلم بهذا المصير ونحن صغار نلعب

الثلاثاء، 8 أبريل، 2008

الى صديقنا الحزين


يا اللى ضليت من كتر ما عرفت البشر

لساك شبه الحجر

والنهر بيفتت فى فرح السنين

واحد وفات جواك الم

وواحد وفات جواك حزين

سيبك من نجيب ومن صلاح ومن جاهين

ان كان القعاد هو الطبيعه

فالبعاد هو القدر

الاثنين، 7 أبريل، 2008

يوميات واحد هيسافر-5

1-
اليوم النهاردة مش زي امبارح خالص..النهاردة اليوم مشحون بالاحداث ومتوتر جدا من صباحية ربنا
صحيت وضربت الدش التمام..اكلت واتفرجت علي برنامج خايب ف التليفزيون وقعدت علي النت اشوف الاخبار والايميلات
نزلت علي الضهر اروح لمقر الشركة اللي هشتغل معاها علشان تاخد بقيت ورقي وتحجزلي تذكرة طيران..وكانت الصدمة؟؟

مفيش لا طيران سعودي ولا مصري فية مكان فاضي لغية يوم 21/4
قولتلهم لالالالالالالالالالالالالالالالالالالالالالالالالالالالالالا
انا مش هقعد لسة كمان 3اسابيع ف البيت انتوا كدة هتخلوا دماغي تصدي ياجماعة..انا كدة ممكن انتحر

لقيت الراجل بيقولي لقيت حل يادكتور
قلتلة قول ياعم
قالة اية رايك تروح اسيوط؟
قلتة لية؟
قالي تركب من مطار اسيوط الدولي هناك هتلاقي حاجة بدري في الوقت

قولتلة مطار اسيوط !!!!!!!!!!!لاياعم ..مش ناقصة اسيوط ربنا يكرمك

قالي طيب اية رايك في مطار الاسكندرية؟؟
قلتلة ان كان كدة يبقي ماشي
قال خلاص يبقي احنا هنحطك في الانتظار علي طيران مطار القاهرة السبت او الحد او الاتنين او تسافر الخميس ان شالله من مطار الاسكندرية
وهنرد عليك يوم الخميس اللي جاي نقولك وصلنا لاية
شرفت يادكتور
سلام
سلام
.........................................................................................................................................................
2-
مشيت انا وزميلي اللي هيسافر معايا في شوراع المهندسين بنتكلم عن اللي حصل فوق في الشركة..وممااستفزيني بشدة انة رافض مبدا السفر من اي مطار غير مطار القاهرة

قولتلة لية؟
قالي شنطتي تقيلة
!!!!!!!!!!!!!
وسعتها حسيت اني انا بتكلم في وادي وهو بيتكلم في واد اخر ..لذلك صمت لغية اخر الطريق وصلت للدقي وروحت مكتبة مبارك دخلت الكافتيريا وقريت كام جرنال ومجلة وقابلت صديقي العزيز اسامة وقعدنا نتكلم عن تحضير الدراسات العاليا والسفر لاوروبا
مشيت من المكتبة وخدها مشي علي كورنيش النيل لغية موصلت لميدان الجيزة ركبت وروحت بيتي قعدت مع ابويا شوية قالي كلام محبط وشكوي اكثر احباطا كعادة جلسات أبي معي.. قمت بعت رسالة جميلة لفتاتي فردت عليها بأسلوب بارد جدا استفزيني ولكني أثرت السكوت
..........................................................................
3- اتصال من واحد صاحبي علي موبايلي تقريبا ستة ونص بليل
اسلام
والدتي توفيت

لا الة الا الله
وانت فين يابني
انا في شبرا
طيب انا جاييلك
قعدت اواسي صديقي وبعدين اتمشيت في شارع شبرا شوية لوحدي
لقيت محل هريسة اشتريت منة هريسة رغم اني مابكلهاش ..بس قولت أهو ادخل عليهم في البيت مرة بحاجة قبل مااسيبلهم البيت

ركبت المترو لقيتهم بيوزعوا برشور لطيف عن مرشحين الحزب الوطني في انتخابات المحليات
البرشور فخم ورقيق جدا..حاجة تفرح
ولكن اللي كتبة اظنة أبو لمعة ...عمال يقول للناس عملنالكم مستشفيات وعملنالكم مدراس وجوزناكم وووو
ومصر بتتقدم بينا
ووووووووووووووووووووووووووووووووووووووووووووووووووووووووووووووووووووووووووووو والحمد لله

الأحد، 6 أبريل، 2008

يوميات واحد هيسافر-4

يوم جديد بيخلص علي الورق..ينتهي النهاردة يوم الاحد 6/4 أو يوم الاضراب.زبيقولوا كان في اضارب النهاردة في مصر ..المهم ان مصر لسة بخير وقاهرة المعز لم يحدث بيها جديد .اللهم الا ان الجو النهاردة كان سيء جدا وكلة تراب وعفرة والدنيا أصفر ف أصفر

صحيت كالعادة متأخر ،بعد ما كنت بصحي الفجر وانا في مصنعي القديم..وانتظر الصحيان في الفجر ايضا ولكن في مصنع اخر ودولة اخري بعد ذلك

النهاردة مزاج الواحد كان مش رايق متعرفش حتي المزاج باين عامل اضراب..؟؟
روحت استلمت تصريح العمل علي الساعة اربعة العصر من فسم الجيزة وشفت منظر بديع جدا..................
شارع المحطة وهو من اكبر شوارع الجيزة طول وعرض كلة عساكر امن مركزي والجيزة كلها امن مركزي لدرجة اني شكيت اني تعبان وبشوف حاجات مش طبيعية
الغريب في الامر ان الحياة تسيير طبيعية جدا وطابور العيش واقف زي ماهو من غير حراك
والناس ماشية في هدوء وتسامح ولا كأنك في القدس ايام دخول صلاح الدين فيها

الحالة بتاعتنا احنا المصريين النهاردة فكرتني بجزء في كتاب الغيطاني(الزيني بركات) وهو بيتكلم عن البصاصين وازاي ان الواحد بقي خايف يقول حاجة لاخوة احسن يلاقي نفسة منخوزق ولا مرمي في سجن القلعة وساد الخوف والترقب والقلق والفزع بين الناس لدرجة ان الراجل بقي خايف من مراتة والست بقيت خايفة من جوزها

المهم سيبك من البصاصين وتعالي نرجع لعام 2008 ..عندي احساس بقولة كتير لكل اللي بيقابلني
انا فعلا حاسس او مش حاسس انا شبة متأكد اننا في مصر خلال فترة قليلة هتحصل حاجة هتقلب الموازين كلها عندنا سواء بقي الحاجة دية للاحسن او للاوحش بس المهم ان في تغييير هيحصل لنا احنا المصريين

عجبني قوي واد عندة حوالي تسعة ولا عشر سنين واقف قدام عربية امن مركزي كبيرة وبيكلم عسكري قاعد جوة العربية بيشرب سيجارة .زالواد بيقولة بكل ثقة (أنت عسكري بيض) ولو راجل اخرج وانزلي
والعسكري بيشتمة من جوة العربية بس مش قاد يخرج من العربية علشان اوامر الباشا بتقول محدش يتحرك من مكانة
تحية عطرة لهذا الطفل الجميل

انا هقفل كلام علي كدة النهاردة لان فعلا النهاردة يوم ملوش لازمة وكفاية نضعع ف وقتنا اكتر من كدة

اختم باعلان جميل اتقال لاهالي مصر من تسعمائة سنة وممكن نعيدة السنة دية بنفس الصيغة

يااهالي مصر
نأمر بالمعروف وننهي عن المنكر
أمر مولانا السلطان
باعدام علي بن ابي الجود
ضربا بالاكف
سيرقص طوال الطريق
كما ترقص النساء
اضربوة
اضربوة
كلما كف
فمن شاءالفرجة
والقصاص من عدو الله
علية الخروج بعد صلاة العصر
يااهالي مصر




السبت، 5 أبريل، 2008

يوميات واحد هيسافر-3

عدت الجمعة ومعاها السبت . بدأت بخطبة جمعة كباقي خطب الجمعة في مصر لاتدري بعد ماتخلص الخطبة هو الشيخ كان عايز منك أية أو أنت عايز أية من الخطبة؟؟ ولكنة عرف سائد بين الناس وهو لماذا نفهم بعض بسهولة ..دع الامور تكون أكثر تعقيدا.

جلست علي النت كعادتي اتصفح يمينا ويسارا كانسان تائهة في غابة كثيرة الاشجار..تكلمت مع فتاتي شوية وتبادلنا صور بنت اختها اللي اتولدت من كام شهر وادتلها صور كنت اتصورتها في فرح بنت عمي يوم الخميس وتكلمنا لغية مازهقت فقمت اكل اي حاجة
وبتوفيق ربنا عرفت اخرج من مشكلة تليفون يوم الخميس وكنت سعيد جدا لدرجة اني اكلت اكل في الغدا عمري مااكلتة وتفرجت علي فيلم حالة حب وشديت البطانية وسافرت في قطار النوم لا احلام ولا حراك لما يزيد عن ثلاث ساعات..صحيت بليل قريت وقريت وقريت لغية الساعة الثالثة فجرا..جيت أنام ربنا رزقني بناموسة نيمتني بعد الساعة أربعة تاركا لها رجلي ووجهي تفعل بة ماتشاء في سبيل اني أنام

صحيت الساعة الثامنة صباحا ..دخلت الحمام ونظرت لوجي في المرأة..منظر رهييب
كل شعرة في رأسي في اتجاة مختلف وشعر دقن متناثر علي الوجة فقمت بالحلاقة والتضبيط وروحت قسم الجيزة اعمل تصريح العمل للسفر للخارج وبالرغم اني كنت الوحيد في المكان ولكن كعادة الموظفين المصريين اجلستني السيدة الظريفة مايزيد عن ربع الساعة كي تشعرني بأن الموضوع هام ومابيخلصش بسرعة
علي العاشرة والنصف صباحا كنت في منزلي كتبت ولخصت الكثير في منهج تكنولوجيا اللحوم ولم يبقي غير محاضرة يتيمة متبقية

خرجت قبلت قتاتي الساعة الثالثة عصرا في شارع الهرم ..قعدنا وحكينا وضحكنا وبعدين لقيتها بتقولي عايزة اروح روكسي اجيب بنطلون بابا كان بيظبطة وطلب مني استلمة دلوقت؟؟؟
بنطلون اية في القاعدة دية دلوقت ..دة وقتة ياعم الحاج
المهم مكدبتش خبر ونزلت معاه وركبنا المواصلة الظريفة (الاتوبيس المكيف) ولفينا في روكسي وجابت لاختها شنطة سودا بمناسبة عيد ميلادها ..وبدا علي ملامحي اني عايز انام ومش مركز ..المهم روحتها وانا رجعت للبيت تاني اتفرجت علي برنامج( الطبعة الاولي) كالعادة جابلي اكتئاب رفع من رصيد زهقي واحباطي لقاهرة المعز ولكن يبقي أن نقول:

لكل بداية نهاية..ولكل أول أخر

الخميس، 3 أبريل، 2008

يوميات واحد هيسافر-2

النهاردة يوم غريب كعادة ايامي المتبقية في قاهرة المعز...........
صحيت وخدت حمام سخن وقعدت اجمع معلومات عن تكنولوجيا اللحوم(تخصصي)،وطار الوقت لغية العصر مابين قرأة وفرجة علي فيلم اجنبي من فترة الستينات علي شانل 2 وقاعدة علي النت وتحميل بعض الاشياء ..حاولت اراجع علي معلوماتي في الانجليزي واثناء ذلك فؤجئت بتليفون؟؟
الو..د.اسلام..
مبروك تاشيرتك طلعت تعالي دلوقت حالا.. ولو مر أكتر من ساعة هنكون قفلنا المكتب..أنت وحظك

طرت من الهرم لجاردن سيتي ولم اصدق..أخيرا بعد معاناة، تلك التأشيرة الخضرا اخيرا علي الجواز..روحت علي بيتي واان سعيد جدا يدوب شربت كوباية شاي ولبست البدلة الانيقة بتاعتي وكرافت أمي كانت اشترتة ليا بمناسبة سفري وروحت مع ابويا وأخويا فرح بنت عمي..يااااااااااااا
هبة بنت عمي اللي كنا بنلعب مع بعض وعشنا ايام جميلة انا وهي واختها مني واحنا صغيرين ،خلاص بقيت زوجة النهاردة حضرنا الفرح في قاعة افراح في المعادي وكان فرح خفيف ولذيذ ..
أتمني لك يا هبة حياة زوجية مطمئنة

وأنا في طريقي للفرح جائني تليفون عكنن فرحتي بهذا اليوم وقلب موازين أفكاري وجعلني لمدة ساعة او يزيد في حالة توهان شديدة..لن أذكرة لانني لا أحب ذكر هذا الموضوع مرة اخري...

اختم يومي النهاردة بجملة عجبتني جدا لدكتور جلال أمين الخبير الاقتصادي وهو في حلقة علي قناة الجزيرة شفتها النهادرة ،قال:

(من لدية القدرة ليس لدية الرغبة ومن لدية الرغبة ليس لدية القدرة)




الأربعاء، 2 أبريل، 2008

يوميات واحد هيسافر-1


1-

تمر الايام علي في تثاقل رهيب ..أتمني أن تسرع خطاها لكي ابعد ..ثم ابعد......ابعد
فاضل أسبوعين او يزيد شوية علي مغادرتي للقاهرة (قاهرة المعز)متجة لمدينة جدة ,,لاأدري لماذا وافقت علي السفر بهذة السرعة فأنا لم يكن مبدا الموافقة الا لشيء واحد فقط هو الهروب ثم الهروب ثم الهروب
هل سأجد حل لمشاكلي في السفر..هل سأجد حياة أخري جميلة وأم أكثر حنانا من أمي؟؟
لا أدري..........
ولكني أعلم تماما اني الان في قاهرة المعز مثل راكب كان في سفينة تحطمت وغرقت بأكلمها ولم يتبقي الا أنا وخشبة حقيرة في وسط محيط هادرة أمواجة لا أعلم الي أين المسير أو كيف الخلاص؟

كل شيء انظر الية حولي أشعر بمرارتة في قلبي وجفاف يدور بحلقي...أكاد لا أطيق النظر الي سائق الميكروباص المتشائم دائما والذي لة وجهة يكاد يكون علامة مسجلة لجميع السواقين هذا الوجة كثير التقاسيم بة شعيرات قذرة متناثرة وفي يدة سجارة كليوبترا حقيرة مثلة يدخنها في وجهي.. وأمامي علي تابلو العربية عبارات مثل ممنوع التدخين ..وسيبوا الناس في حالها ..ولو باض الديك مش هعديك!!
اترك السائق واقسم ان اقطع اغلب مشاويري في شوارع القاهرة ماشيا علي الاقدام حتي ابعد نفسي عن الاحتكاك بأحد
أسير فاخذ نفس عميق فيدخل في صدري عادم خليط من الرصاص وبنزين80 فأشعر بسعادة بالغة لاني الحمد لله مزلت صحيح معافي من داء سرطان الرئة رغم أطنان الرصاص والبنزين اللي شممتها في القاهرة.

2-

ذهبت اليوم الي كليتي العزيزة علشان استلم شهادة بقالي شهر عايز اخدها ومش عارف...قبلت ناس معرفهاش وناس أقل أعرفها ،تكلمت وضحكت وسخرت وجلست مع صديقي بوجهة الضاحك الباكي ضحكة ظاهرة وحزن مرير مدفون بداخل هذا الرجل..أهداني أحدي كتبة الجميلة وأعطاني الاخر علي سبيل الاستعارة ففرحت جدا ان هناك من يزال يذكرني أني رجل أتذوق الادب والثقافة.شكوت لة ألالامي وحكيت لة عن أمالي وهو في انصات شديد.

وجدت فتاتي اليوم تنتظرني امام مبني الادارة في الكلية فتركت مناقشاتي وذهبت اليها تحدثنا وهمسنا وضحكنا وحلمنا مع بعض بعض الاحلام لكي ننسي واقع السفر الذي سيبعدنا عن بعض عن مايزيد من عام ولكننا نعلم انة الخلاص الوحيد لذلك نصمت مرغمين

3-

الكتاب ملاذي الاول والاخير من عالم حولي يشبة مولد سيدي البدوي لا تعرف لة أول من أخر عبارة عن لوحة مليئة بالتفاصيل فهناك رجال تلتصق بنساء وأطفال تصرخ وأصوات سعد الصغير وطارق الشيخ تفوح كالدخان الثقيل من المحلات...وتوك توك ماشي مسرع في الشارع كأنة عرسة وهربانة من محل قديم ورايحة لمحل أخر ..أخي يرقد مستلقيا علي ظهرة كعادتة يحدث بنت في التليفون ..دخلت الحمام حتي أجد ملجأ هادئا من هذا العالم ومعي الكتاب الذي اعطاني اياة صديقي وأخذت أقرا وأحلم وأعيش بداخل الرواية..

4-
انظر الي محفظتي فأجدها شبة خاوية ،ينظر منها بعض الجنيهات الحقيرة برائحتها النتنة ..فياخذني التفكير مالذي سأفعلة في الاسبوعين القادمين وفاجأة ينطلق صوت عمي في التليفون ببشري سارة.. لقد جائني مبلغ من المال من المصنع اللي كنت شغال فية تصفية حساب يعني وهيدهوني بكرة في فرح بنت عمي ،اللي كل ماأكلمها تقولي يااسلام مش عارفة حاسة اني مش طبيعية مش طبيعية خالص، وتسألني سؤال خبيث لا أجد لة جواب الا بضحكة ساخرة (الا قولي يااسلام تتوقع انا ومحمد جوزي هنعمل اية مع بعض ف اول يومين من جوازنا..........

عل المصطبة

1-التجليات:
موضوع غريب صحيح أني اتكلم عن هذا الرجل ولكن الاغرب اني متكلمش عنة بعد ماقريت رائعتة(التجليات)ومن بعدها شربت من نهر عذب متواصل الافكار بين عبق الماضي ونضارة الحاضرة ونعومة المستقبل
انة الكاتب والاديب (جمال الغيطاني) انا أصريت اني اكلم علية شوية لان فعلا الراجل دة ياجماعة مش واخدة قيمتة وحقة في هذا المجتمع الضال واصبح مثل ماسة يلعب بها طفل مصابة بالبلاهة ولايعرف قيمة مافي يدة...ماهذا الفكر الذي يجمع الم الماضي وتساؤل الحاضر وحيرة المستقبل يجمع بخيوط من ذهب بين الصوفية وحب أل البيت وسيدنا الحسين او مولانا الحسين كما يحب ان يسمية وبين الاشتراكية وعبد الناصر الذي يعتبرة وجة مصر الاول والاخير
لمن يريد ان يعرف عن الادب المصري شيء وعن التاريخ العربي الاسلامي الجميل شيء وعن اجمل الكلمات واسماها شيء فليقرأ لهذا الرجل شيء..تحيات الي كاتبنا الكبير جمال الغيطاني
...................................................................
2-الفلكلور:
سؤال كل مااشوف واحد غاوي ادب علي ثقافة اروح اسئل بشدة كطفل يريد اجابة علي سؤال جنسي محرج
هو فين الفلكلور او الفن الشعبي بتاعتنا بتاع مصر؟؟
فوجئت وانا في احدي متاحف القاهرة الفنية الكبري انهم عاملين مكتبة للاجانب اللي عايزين يتعرفوا علي وجهة مصر الثقافي فضمت المعروضات شباشب وسبح وخرز ازرق وكام اسطوانة لفيفي عبدة باعتبار انها تمثل الفن المصري اللي هو الرقص الشرقي
ياتري هو دة فن مصر الشعبي؟؟يتمثل في فيفي عبدة وسعد الصغير وشعبان عبد الرحيم.زأني والله لاجد اننا جعلنا الفلكور بدل من طفل جميل مدلل نتفاخر بة وسط الامم..جعلناة كائن ممسوخ المعالم تتقزز النفوس وتقشعر الابدان من رؤيتة
لقد فتنت بدولة مثل اسكتلندا من الفن الشعبي لها المتمثل في موسيقي القرب الشهيرة والعرض المميز البسيط اللي خلي الواحد اول مايتتقال اسكتلندا يفتكر هذا العرض
وسيظل السؤال يحيرني :أين الفن الشعبي المصري
أين السمسمية وأين الفنون الاستعراضية المصرية الخالصة واين الليلة الكبيرة
............................................................................................
3-قلب و4 رجول:
اتعجب أحيانا وأتسائل كثيرا أية اللي يخلي قط من القطط ولا خروف من الخرفان يعجبة أنثي معينة ويروح لها ويظهر عضلاتة وفحولتة ويعرض عن اخريات في نفس صفيحة الزبالة لو قطط او في نفس القطيع
بالرغم ان مفيش واحدة فيهم مثلا حاطة ميك أب او لابسة ضيق او حتي ليها عقل تقدر تقنعة وتسحرة بأفكارها...أكيد هتقولي يابني دة مش حب دة فكر غريزي من الدرجة الاولي وأنا اتفق معاك شكلا واختلف مضمونا .طيب ممكن تقولي لية الانثي البشرية بتتفنن في ابراز معالمها الانثوية وتتظاهر اذا رأت انها شدت انتباة احد من القطيع الذكورية البشرية بأنها تغطي نفسها او تنظر لة باحتقار علي اساس انة المفروض مايبصش
هو دة بردة مش فكر غريزي

السبت، 22 مارس، 2008

مزانيق

أخي البطري


شارك معنا


في أقوى حملة يقودها طلاب الطب البيطري جامعة القاهرة لاسترداد حقوقهم المسلوبة

stop

مزانيق
بيطريون ضد المفاتيح


Toilet

أهداف الحملة :
1- إعادة فتح جميع الحمامات التي تم سنكرتها بالمفاتيح لصالح الإدارة و الأقسام بعد الوكسة الأخيرة مع لجنة أعتماد الجودة
2- البدأ بتشغيل دورات المياه الجديدة في أقرب وقت ممكن و بشكل آدمي و حضاري


شعارنا :
أزاي أذاكر ولا أفكر
وأنا محصور مش عارف أترتر
*
يا عميد فوق فوق
أزاي هأحضر وأنا مزنوق
*
يا عميد يا مرتاح
ليه القفل بالمفتاح
*
يا عميد خليك صريح
حتى الشخة بالتصريح


تنويه :
مفردات وصل المصاريف لهذا العام :
الوصل الصغير : 15 جنيه و تسعين قرش (غير معلومة الهدف إلا لله و الراسخين في العلم )
الوصل الكبير :
2 جنيه مساهمة / رسوم
20 جنيه أنشاءات و ترميمات
60 جنيه طلاب وافدين (يعني أيه ؟؟)
10 جنيه كارنيه
20 جنيه (كلمة غير مقروءة إطلاقا)
30 قرش للمجلة العلمية
20 قرش (مش قدامها أي حاجة !!)

الخميس، 20 مارس، 2008

تساؤلات وابتسامات .. د.جيفارا

في اسئلة و خلينا نقول انها ردود افعال تلقائية بتلاقيها مرسومة علي وجوة الناس
مساء الخير مع حضرتك د/اسلام عبد الخالق
وحضرتك دكتور في اية ياستاذ اسلام؟؟
دكتور بيطري حضرتك
قبل اي كلام او تحليل للموقف بتلاقي ابتسامة علي وجهة هذا الشخص ممكن كل واحد يقولي تحليلة للابتسامة المبدئية اللي بتحصل دية؟؟
...............................
حاجة تانية:
في اتوبيس الحكومة بتلاقي الراجل راشق في اي واحدة واقفها القدر قصادة
ياتري دة كبت جنسي ولا نوع من....؟؟
...............................
التالتة:
ابوك وابويا ياتري دول كانوا أطفال في يوم من الايام...؟؟
................................
والرابع:
لو أنت واقف بتشتري لبس من محل ولقيت راجل بيسائل البت اللي بتبيع سؤال مفاجيء وعايز رد سريع:
عندك سونتيانات حمرا ؟؟
ياتري اية اللي جبر الراجل دة علي سؤال زي دة ف توقيت زي دة؟؟
...........................
نكمل تساؤلات بعد الفاصل
--------------
صديقي أسلام كتب الكلام ده في تعليق
أتعلم التدوين بقى يا راجل

الثلاثاء، 18 مارس، 2008

السلام عليكم

أزيكم يا دكاترة .. يارب تكونوا بخير
أهلا بيكم في وطنكم التاني

معلش أنا مش هأطول دلوقتي
بس باختصار المدونة دي أتمنى تكون ملتقى للمدونين البيطريين

و عليه فأنا باتمنى من كل زميل من المدونين البيطريين أنه يشاركنا في أتحادنا

ومتجمعين عند النبي أنشاء الله

الأتحاد قوة

الله .. الوطن .. أنا ومن بعدي الطوفان